Kandidati për deputet nga radhët e Partisë Demokratike të Kosovës (PDK), Bekim Haxhiu, ka ndërmarrë hapa ligjorë duke kërkuar rinumërimin e plotë të votave për të gjithë kandidatët e kësaj partie, pas përfundimit të zgjedhjeve parlamentare të 7 qershorit. Ankesa është dorëzuar zyrtarisht në Panelin Zgjedhor për Ankesa dhe Parashtresa (PZAP).
Sipas Haxhiut, kërkesa e tij buron nga gjetjet gjatë procesit të rinumërimit të pjesëshëm të zhvilluar nga Komisioni Qendror i Zgjedhjeve (KQZ). Në 185 vendvotime, që përbëjnë rreth 3.52% të totalit të votave të PDK-së, janë evidentuar gabime në numërimin fillestar. Haxhiu bëri të ditur se, vetëm në këtë mostër të kufizuar, atij i janë shtuar 6 vota që nuk ishin regjistruar më parë.
Duke qenë se rezultati aktual e lë atë jashtë Kuvendit me një diferencë prej 102 votash, Haxhiu argumenton se çdo pasaktësi mund të ndikojë në përbërjen përfundimtare të grupit parlamentar të PDK-së, parti e cila ka siguruar 22 ulëse. Ai theksoi se besimi në procesin zgjedhor mbështetet mbi transparencën dhe saktësinë e votës, duke shtuar se përparësi duhet t'i jepet verifikimit të plotë të vullnetit të qytetarëve.
Në deklaratën e tij, Haxhiu rikujtoi se edhe në proceset e mëparshme zgjedhore, përfshirë ato të 28 dhjetorit 2025, ka denoncuar parregullsi të ngjashme. Tashmë pritet vendimi i PZAP-it lidhur me kërkesën për verifikimin e të gjitha votave të kandidatëve që nuk janë përfshirë në procesin e deritanishëm të rinumërimit.
Përditësime
Kandidati i PDK-së, Qëndrim Kryeziu, ka parashtruar ankesë zyrtare në PZAP me kërkesën për rinumërim të plotë të votave për të gjithë kandidatët. Kryeziu pretendon se, pas rinumërimit të 185 vendvotimeve, atij i janë shtuar 589 vota, shifër kjo dukshëm më e lartë se 6 votat e pretenduara më parë nga kandidati tjetër, Bekim Haxhiu.