PZAP refuzon të gjitha ankesat për zgjedhjet e 7 qershorit (1 Përditësim)

Paneli Zgjedhor për Ankesa dhe Parashtresa (PZAP) ka miratuar vendimin për refuzimin e të gjitha ankesave të parashtruara pas shpalljes së rezultateve përfundimtare të zgjedhjeve të parakohshme parlamentare të mbajtura më 7 qershor 2026. Sipas vendimeve të publikuara, ankesat janë vlerësuar si të pabazuara dhe pa prova të mjaftueshme.

Ndër ankesat e refuzuara janë ato të kandidatëve të Partisë Demokratike të Kosovës (PDK), Qëndrim Kryeziu dhe Bekim Haxhiu, të cilët kishin kërkuar rinumërimin e plotë të votave për kandidatët e subjektit të tyre politik. Gjithashtu, PZAP-i ka hedhur poshtë ankesat e Nova Demokratska Stranka (NDS), të parashtruara nga Emilija Rexhepi, si dhe ankesën e Listës Serbe.

Sipas dokumentacionit, Emilija Rexhepi kishte kontestuar ligjshmërinë e votave të subjektit “Za slobodu, pravdu i opstanak” në qendrat e votimit në komunën e Prizrenit, duke pretenduar mungesë të popullsisë serbe në ato zona. Nga ana tjetër, Lista Serbe kishte pretenduar se partia e Nenad Rashiqit ka siguruar vota në mjedise ku prezenca e komunitetit serb është e papërfillshme. Në vendimin e tij, PZAP-i sqaroi se lista e votuesve nuk përmban të dhëna për përkatësinë etnike dhe se nuk ekziston bazë ligjore për të shpallur të pavlefshme votat në fjalë.

Pas këtij vendimi, palët kanë të drejtë të ankohen në Gjykatën Supreme brenda afatit ligjor prej 48 orësh. Nëse nuk ushtrohen ankesa të reja, Komisioni Qendror i Zgjedhjeve (KQZ) do të ketë hapësirën ligjore për të proceduar me certifikimin e rezultateve përfundimtare të këtyre zgjedhjeve, të cilat u mbajtën si rrjedhojë e dështimit të Kuvendit për të zgjedhur Presidentin e vendit brenda afateve kushtetuese.