Gjykata Supreme e Kosovës ka refuzuar të gjitha gjashtë ankesat administrative të paraqitura kundër vendimeve të Panelit Zgjedhor për Ankesa dhe Parashtresa (PZAP), lidhur me zgjedhjet e parakohshme parlamentare të 28 dhjetorit 2025. Vendimi u mor më 9 shkurt 2026 dhe lë në fuqi vendimet e PZAP-së në të gjitha rastet.
Gjykata thekson se pretendimet e ankuesve nuk u mbështetën me prova konkrete dhe se vetëm shkeljet e provuara, që ndikojnë drejtpërdrejt në rezultat, mund të justifikojnë ndërhyrje. Anulimi i votave mbi baza etnike nuk përputhet me Kushtetutën, ligjin zgjedhor dhe standardet ndërkombëtare.
Ankesat e refuzuara
• Aktgjykimi AA.nr.6/2026: Refuzohet ankesa e Partia Rome e Bashkuar e Kosovës (PREBK), e cila kontestoi rezultatet e përgjithshme të zgjedhjeve për parregullsi në numërimin e votave në Qendrën e Numërimit dhe Rezultateve. Gjykata vlerësoi se pretendimi për disproporcion midis votave dhe numrit të banorëve rom nuk qëndron, pasi përfaqësimi politik i këtij komuniteti u sigurua edhe me vota nga komunitetet e tjera.
• Aktgjykimi AA.nr.7/2026: Refuzohet ankesa e Koalicionit PAI–PDAK–LPB, i cili kërkoi shfuqizimin e vendimit të PZAP-së dhe rinumërim të plotë të votave. Gjykata konstatoi mungesë provash për shkelje, parregullsi apo manipulime.
• Aktgjykimi A.A.nr.8/2026: Refuzohet ankesa e Emilija Rexhepit nga Nova Demokratska Stranka (NDS), e cila kërkoi anulimin e 85 votave për Koalicija Vakat në vendvotimin e Velezhës, në kuadër të mandatit të rezervuar për komunitetin boshnjak. Gjykata theksoi se pretendimet pa prova konkrete cenojnë sigurinë juridike dhe besimin në procesin zgjedhor.
• Aktgjykimi A.A.nr.9/2026: Refuzohet ankesa e Nova Demokratska Stranka (NDS) kundër votave për subjektin Za Slobodu, Pravdu i Opstanak në disa vendvotime në Prizren. Gjykata vlerësoi se vlefshmëria e votës nuk kushtëzohet me përkatësinë etnike të votuesit, por me regjistrimin e tij të ligjshëm.