Kolegji i Gjykatës Supreme të Kosovës ka refuzuar si të pabazuar ankesën e Lëvizjes Vetëvendosje (LVV) kundër vendimit të Panelit Zgjedhor për Ankesa dhe Parashtresa (PZAP) të datës 22 maj 2026. Çështja lidhej me refuzimin e kërkesës së LVV-së për mbajtjen e një tubimi politik në Sheshin “Skënderbeu” në Prishtinë, në kuadër të fushatës për zgjedhjet e parakohshme parlamentare të 7 qershorit 2026.
Në ankesën e saj, LVV-ja pretendoi se PZAP-ja kishte zbatuar gabimisht nenin 4 të Rregullores Zgjedhore Nr. 07/2024. Gjithashtu, subjekti politik argumentoi se kërkesa e dorëzuar nga Partia Demokratike e Kosovës (PDK) më 30 prill 2026 nuk mund të krijonte përparësi procedurale, pasi në atë periudhë Komisioni Komunal i Zgjedhjeve (KKZ) në Prishtinë ende nuk ishte konstituar.
Megjithatë, Gjykata Supreme vlerësoi se vendimi i PZAP-së ishte i drejtë, i ligjshëm dhe në përputhje me dispozitat e Ligjit për Zgjedhjet e Përgjithshme. Sipas dokumentacionit të shqyrtuar, rezulton se PDK-ja e kishte bërë kërkesën për rezervimin e lokacionit më 30 prill 2026, ndërsa LVV-ja e kishte dorëzuar kërkesën e saj më 8 maj 2026.
Gjykata konstatoi se Komisioni Komunal i Zgjedhjeve kishte vepruar në përputhje me rregulloren, e cila lejon refuzimin e një kërkese kur hapësira është rezervuar paraprakisht nga një subjekt tjetër politik. Rrjedhimisht, pretendimet e LVV-së për mungesë arsyetimi nga ana e institucioneve zgjedhore u hodhën poshtë si të pabazuara.