Gjykata Supreme e Kosovës e ka shpallur të pabazuar ankesën e Lëvizjes Vetëvendosje (LVV), duke mbështetur vendimin e Panelit Zgjedhor për Ankesa dhe Parashtresa (PZAP) për ndëshkimin e këtij subjekti politik me gjobë prej 6,000 eurosh. Procedura kishte nisur pas ankesave të paraqitura nga Instituti Demokratik i Kosovës (KDI), lidhur me pjesëmarrjen e të miturve në dy tubime zgjedhore të organizuara më 3 qershor 2026 në Podujevë dhe Lipjan, në kuadër të fushatës për zgjedhjet e parakohshme të 7 qershorit 2026.
Në argumentet e saj, LVV-ja kishte pretenduar se rregullorja përkatëse nuk ndalon thjesht praninë e të miturve në aktivitete politike, por vetëm angazhimin e tyre aktiv, duke theksuar se një angazhim i tillë nuk ishte provuar. Megjithatë, Gjykata Supreme vlerësoi se PZAP-i ka zbatuar drejt dispozitat e Rregullores Zgjedhore Nr. 07/2024.
Sipas vendimit të Supremes, qëllimi kryesor i nenit 5, paragrafi 3 i kësaj rregulloreje është mbrojtja e të miturve nga përfshirja në aktivitete politike, në përputhje me interesin më të mirë të fëmijës. Gjykata theksoi se përgjegjësia e një subjekti politik nuk përjashtohet edhe në rastet kur të miturit marrin pjesë të shoqëruar nga prindërit ose kur iniciativa për pjesëmarrje vjen nga vetë ata.
Ndër të tjera, Gjykata Supreme vuri në dukje se PZAP-i kishte marrë parasysh edhe faktin që subjekti ishte njoftuar më parë mbi obligimet ligjore, si dhe faktin se kjo parti kishte qenë objekt i sanksioneve për shkelje të ngjashme edhe në të kaluarën.