Kolegji i Gjykatës Supreme ka vlerësuar se ankesa e Lëvizjes Vetëvendosje kundër vendimit të Panelit Zgjedhor për Ankesa dhe Parashtresa (PZAP) është e pathemeltë. Me vendimin ZP.Anr.11/2026 të datës 3 qershor 2026, PZAP kishte gjobitur subjektin politik për shkak të angazhimit të një të miture nën moshën 15-vjeçare gjatë një aktiviteti të fushatës zgjedhore.
Sipas provave të administruara, incidenti ka ndodhur më 31 maj 2026 gjatë një tubimi në Vushtrri, ku një vajzë 10-vjeçare doli në skenë dhe recitoi e veshur me shenjat e subjektit politik. Gjykata ka theksuar se përgjegjësia për mbarëvajtjen e tubimit i përket organizatorit, pavarësisht pretendimeve të partisë se e mitura nuk ishte pjesë e programit zyrtar.
Vendimi vlerëson se pjesëmarrja e fëmijëve nën moshën 15-vjeçare në aktivitete zgjedhore është në kundërshtim me rregulloret në fuqi. Për këtë arsye, gjykata ka gjetur se gjoba prej 5.100 euro është e ligjshme dhe e bazuar në shkresat e lëndës.
Përditësime
Gjykata Supreme la në fuqi vendimin e PZAP-it të datës 03.06.2026 për gjobitjen e Lëvizjes Vetëvendosje. Partia kishte pretenduar se e mitura nuk ishte pjesë e programit dhe se ajo ishte e pranishme në tubim nën mbikëqyrjen e prindit.