Panairi i Produkteve Artizanale është rikthyer për edicionin e tij të katërt në ambientet e Green Coast. Nën konceptin “DUART”, ky aktivitet vuri në fokus mjeshtërinë e punës së dorës dhe procesin krijues që qëndron pas objekteve artistike. Përgjatë shëtitores buzë detit, artizanët ekspozuan një gamë të gjerë krijimesh, duke përfshirë punime në qeramikë, dru dhe qelq, si dhe bizhuteri, skulptura, qilima, makrame, çanta, qirinj, sapunë dhe parfume.
Edicioni i këtij viti solli një risi përmes dy masterclass-eve interaktive, ku pjesëmarrësit patën mundësinë të njiheshin nga afër me procesin e prodhimit të parfumeve dhe qirinjve. Vizitorët, përfshirë turistë të huaj, u angazhuan në krijimin e produkteve të tyre dhe në zbulimin e teknikave të ndryshme artizanale. Sipas artizanëve dhe vizitorëve, aktiviteti u vlerësua si një mundësi e shkëlqyer për të prekur nga afër traditën dhe për të ndërvepruar drejtpërdrejt me krijuesit.
Ky panair vazhdon të jetë pjesë e kalendarit veror të Green Coast, duke shërbyer si hapësirë për ndërthurjen e artit, kulturës dhe traditës vendase me elemente bashkëkohore. Organizatorët synojnë përmes këtyre eventeve t'i dhurojnë një dimension të shtuar eksperiencës së pushuesve, duke promovuar njëkohësisht vlerat artistike të Shqipërisë.