Pas dështimit për t'u kualifikuar në Kupën e Botës për herë të tretë radhazi, Federata Italiane e Futbollit (FIGC) ka zyrtarizuar ndryshime të rëndësishme në strukturën e saj drejtuese. Ish-mbrojtësi Paolo Maldini ka pranuar ofertën e presidentit Giovanni Malagò, duke nënshkruar një kontratë 4-vjeçare për postin e Drejtorit Teknik.
Krahas këtij roli, Maldini është emëruar president i Club Italia, një strukturë me përgjegjësi të gjera për koordinimin e përfaqësueseve kombëtare. Në këtë projekt të ri, ai do të bashkëpunojë me ish-futbollistin brazilian Leonardo, i cili do të shërbejë në rolin e këshilltarit.
Detyra primare e dyshes do të jetë emërimi i trajnerit të ri të kombëtares. Megjithëse kandidatët më të përfolur dhe favoritët për stolin mbeten Roberto Mancini dhe Antonio Conte, në listën e kandidatëve figurojnë edhe emra si Stefano Pioli, Carlo Ancelotti dhe Pep Guardiola. Vendimi për trajnerin e ri pritet të bëhet publik brenda pak ditësh.