Papa Leoni, i cili vitin e kaluar u bë Papa i parë i lindur në SHBA, kritikoi udhëheqësit botërorë për shpenzimet e mëdha në luftëra gjatë vizitës së tij në Kamerun. Duke folur në Bamenda, në rajonin anglishtfolës të prekur nga një kryengritje prej gati një dekade, ai deklaroi se bota "po shkatërrohet nga një grusht tiranësh".
Papa dënoi ata që, sipas tij, manipulojnë "vetë emrin e Zotit" për përfitime ushtarake, ekonomike e politike. Ai theksoi se liderët "mbyllin sytë përballë faktit se miliarda dollarë shpenzohen për vrasje dhe shkatërrim, ndërsa burimet e nevojshme për shërim, arsim dhe rindërtim nuk gjenden askund". "Zotërinjtë e luftës bëjnë sikur nuk e dinë se mjafton një moment për të shkatërruar, por shpesh nuk mjafton as një jetë e tërë për të rindërtuar", u shpreh ai.
Deklaratat e Papës vijnë pas një përplasjeje me presidentin amerikan Donald Trump. Ky i fundit publikoi një koment të gjatë në Truth Social kundër Papës, pas kritikave të këtij të dytë ndaj operacioneve ushtarake të SHBA-së dhe Izraelit në Iran. Papa kishte shprehur shqetësim për kërcënimin e Trump-it se "një civilizim i tërë do të vdesë" nëse Irani nuk pranon kërkesat për të dhënë fund luftës dhe për të hapur Ngushticën e Hormuzit. Më parë, Papa kishte vënë në pikëpyetje qasjen e administratës Trump ndaj emigracionit. Trump shkroi se "Leoni duhet të rregullohet si Papë" ose "të merret me detyrën e tij si Papë".
Në Kamerun, Papa dënoi "ciklin e pafund të destabilizimit dhe vdekjes" në rajonin e përgjakur. Ai përmendi se ata që grabisin tokën dhe burimet investojnë fitimet në armë, duke përjetësuar dhunën. Pavarësisht kritikave, Papa përcjell shpresë, duke thënë se bota mbahet nga "një mori vëllezërish dhe motrash mbështetëse".