Forcat e Komisariatit të Policisë Kavajë dhe Postës së Policisë Rrogozhinë parandaluan një ngjarje të rëndë kriminale në zonën e Spillesë. Pas marrjes së një informacioni operativ për një konflikt në zhvillim, shërbimet policore ndërhynë në kohë dhe bënë të mundur kapjen në flagrancë të shtetasit Neldi Hallulli, 31 vjeç.
Në momentin e ndërhyrjes, 31-vjeçari ishte i armatosur me një kallashnikov dhe municion luftarak. Nga hetimet paraprake dyshohet se ai kishte pasur një konflikt me 38-vjeçarin Indrit Rama dhe kishte për qëllim ta vriste atë. Arma e zjarrit u sekuestrua në cilësinë e provës materiale.
Në vijim të veprimeve hetimore, policia ka proceduar penalisht edhe shtetasin Indrit Rama, 38 vjeç. Ai akuzohet për veprën penale "Dëmtime të tjera me dashje", pasi gjatë konfliktit ka goditur me grushte 31-vjeçarin, duke i shkaktuar dëmtime të lehta trupore. Materialet procedurale i janë referuar Prokurorisë për veprime të mëtejshme.