Shërbimet e Komisariatit të Policisë Durrës ndërhynë pas informacioneve për një konflikt në lagjen nr. 8 të qytetit, duke parandaluar përshkallëzimin e situatës. Në kuadër të operacionit policor të koduar “Relatives”, u bë ndalimi i shtetasit H. Ll., 36 vjeç, banues në Durrës.
Sipas njoftimit zyrtar, 36-vjeçari dyshohet se u përfshi në një konflikt për motive të dobëta me shtetasin E. B., 69 vjeç. Gjatë këtij konfrontimi, i arrestuari ka kanosur të moshuarin me një armë zjarri të tipit kallashnikov, të cilën e mbante pa leje. Gjatë kontrollit të ushtruar në banesën e H. Ll., policia gjeti dhe sekuestroi armën e dyshuar, si dhe një krehër me municion luftarak.
I arrestuari njihet nga organet ligjzbatuese për precedentë të mëparshëm penalë në fushën e armëmbajtjes pa leje dhe krimeve kundër personit. Materialet procedurale i janë përcjellë Prokurorisë pranë Gjykatës së Shkallës së Parë të Juridiksionit të Përgjithshëm Durrës për hetime të mëtejshme.