Ditën e premte, 20 shkurt 2026, moti në Shqipëri parashikohet i paqëndrueshëm, me vranësira mesatare deri të dendura. Reshjet e shiut do të jenë prezente që në orët e para të ditës, fillimisht në veri e jug të vendit dhe gradualisht në të gjithë territorin, me intensitet të ulët e lokalisht mesatar.
Gjatë orëve të mëngjesit, në ekstremin verior, lokalisht në lindje dhe në jug, reshjet priten me intensitet deri të lartë, në formën e shtrëngatave shoqëruar me shkarkesa elektrike. Pas mëngjesit, reshjet do të vazhdojnë me intensitet të ulët në pjesën më të madhe të vendit, me shtrëngata afatshkurtra lokalisht.
Në zonën e Alpeve, verilindje-juglindje mbi 800-900 metra, do të ketë reshje dëbore me intensitet të ulët e lokalisht mesatar.
Era do të fryjë me drejtim juglindje-jugperëndim, me shpejtësi mesatare 7 m/s. Përgjatë vijës bregdetare dhe në zonat luginore, shpejtësia e erës arrin deri në 16 m/s.
Valëzimi në det parashikohet i forcës 2-4 ballë.
Të gjitha parashikimet bazohen në të dhënat e Shërbimit Meteorologjik Ushtarak (SHMU). Ndiqni përditësimet zyrtare për ndryshime.