Sipas Shërbimit Meteorologjik Ushtarak, dita e mërkurë, 3 qershor 2026, do të karakterizohet nga kushte atmosferike relativisht të paqëndrueshme. Moti parashikohet fillimisht i kthjellët, ndërsa gradualisht do të ketë shtim të vranësirave mesatare deri të dendura, më të theksuara pas orëve të mesditës.
Reshjet e shiut me intensitet të ulët parashikohen të shfaqen gjatë orëve të mesditës dhe pasdites në veri. Në orët e vona të mbrëmjes, reshjet e shiut me intensitet të ulët do të prekin të gjithë territorin. Ndërkaq, në zonën e veriperëndimit dhe pjesërisht përgjatë Ultësirës Perëndimore, reshjet pritet të jenë me intensitet mesatar deri të lartë, në formën e shtrëngatave dhe stuhive afatshkurtra.
Era do të fryjë nga drejtimi juglindje-jugperëndim me një shpejtësi mesatare prej 7 m/s. Përgjatë vijës bregdetare dhe në zonat luginore, shpejtësia e erës pritet të arrijë deri në 18 m/s, duke sjellë valëzim në dete të forcës 3 deri në 4 ballë.