Për ditën e enjte, parashikohet një mot kryesisht i kthjellët në të gjithë territorin, me alternime vranësirash më të theksuara në zonat lindore dhe jugore. Sipas njoftimeve të institucioneve meteorologjike, në orët e mesditës dhe pasdites, vranësirat pritet të jenë më të dendura përgjatë relieveve malore, duke sjellë reshje shiu me intensitet të ulët dhe shtrëngata afatshkurtra të izoluara.
Temperaturat do të mbeten të larta. Vlerat maksimale parashikohen të arrijnë 39 gradë Celsius në qytetet e Elbasanit dhe Gjirokastrës, ndërsa në qytete të tjera si Shkodra, Tirana dhe Berati priten vlera deri në 38 gradë Celsius. Në qytetin e Bajram Currit, temperatura maksimale është parashikuar të shënojë 34 gradë Celsius.
Era do të fryjë në drejtimin veriperëndim-verilindje. Shpejtësia mesatare e erës varion nga 6 deri në 7 m/s, ndërsa përgjatë vijës bregdetare dhe në zonat luginore, ajo do të arrijë shpejtësi deri në 14 m/s. Për sa i përket detit, valëzimi parashikohet të jetë i forcës 1-3 ballë.