Për ditën e sotme, 24 gusht 2026, vendi ynë ndikohet nga kushte atmosferike të qëndrueshme. Moti parashikohet kryesisht i kthjellët, me alternime vranësirash, të cilat do të bëhen herë pas here më të dendura përgjatë relieveve kodrinore dhe malore nga mesdita deri në orët e pasdites. Në këto zona, priten reshje shiu afatshkurtra, lokale dhe në formën e pikave, të cilat do të ndërpriten pas orëve të pasdites.
Temperaturat do të shënojnë vlera të larta. Sipas raportimeve, në qytetin e Fierit pritet të arrijnë deri në 38°C, ndërsa në Tiranë dhe zonat bregdetare deri në 37°C. Era do të fryjë kryesisht nga drejtimi verilindje-veriperëndim, me një shpejtësi mesatare prej 7 m/s, duke arritur deri në 14 m/s përgjatë vijës bregdetare dhe zonave luginore. Valëzimi në det parashikohet të jetë i forcës 1-3 ballë.
Përditësime
Sipas të dhënave të përditësuara nga Shërbimi Meteorologjik Ushtarak, qyteti i Gjirokastrës i shtohet listës së zonave që pritet të regjistrojnë temperatura maksimale deri në 38°C gjatë ditës së sotme.