Përpara ndeshjes çerekfinale të Kupës së Botës 2026 mes Francës dhe Marokut, autoritetet franceze kanë shpallur një plan sigurie me rrezik të lartë për rendin publik. Prefektura e Policisë ka vendosur masa të posaçme të cilat hyjnë në fuqi nga ora 21:00, një orë përpara nisjes së takimit.
Në terren janë angazhuar 5 mijë efektivë policie dhe xhandarmërie për të mbikëqyrur zonat kritike të kryeqytetit. Zona e Place de l’Étoile pranë Harkut të Triumfit do të mbyllet, ndërsa bulevardi Champs-Élysées do të jetë nën monitorim të rreptë. Për shkak të rrezikut nga vandalizmi, disa biznese kanë blinduar vitrinat, ndërsa është ndaluar përdorimi i mjeteve piroteknike.
Monitorimi do të kryhet edhe nga ajri përmes dronëve të autorizuar. Gjithashtu, lëvizja në transportin publik do të kufizohet, me mbyllje të përkohshme të stacioneve të metrosë në linjat 6, 8, 9, 12 dhe 14.
Sipas të dhënave, komuniteti maroken në rajonin metropolitian të Parisit numëron rreth 300 mijë banorë, ndërsa në të gjithë Francën jetojnë rreth 2.2 milionë persona me origjinë marokene. Autoritetet po ndjekin me vëmendje edhe shqetësimet për mundësinë e provokimeve nga grupe ekstremiste, duke shtuar patrullimet pranë objekteve të kultit dhe zonave ku po përgatiten festimet për Festën Kombëtare të 14 Korrikut.