Parlamenti Europian miratoi rezolutën për përparimin e Shqipërisë në procesin e integrimit evropian, në një seancë ku u regjistruan 483 vota pro, 103 kundër dhe 70 abstenime. Një ndër pikat e diskutuara ishte amendamenti që synonte vendosjen e kufizimeve për zhvillimet në zonën e mbrojtur të Vjosë-Nartës, si dhe për zonat e Sazanit dhe Zvërnecit, i cili u rrëzua nga shumica e eurodeputetëve.
Kryeministri i Shqipërisë, Edi Rama, reagoi përmes rrjeteve sociale pas votimit, duke vlerësuar qëndrimin e institucionit evropian si mbështetje për rrugën integruese të vendit. Ai deklaroi se debati rreth zonave të mbrojtura është instrumentalizuar nëpërmjet një "stuhie digjitale dezinformimi". Sipas tij, amendamenti i rrëzuar nuk përputhej me realitetin e zhvillimit të planifikuar në këto zona.
Lidhur me shqetësimet e ngritura nga protestat për mbrojtjen e flamingove dhe ekosistemit të Vjosë-Nartës, Rama siguroi se mjedisi do të jetë i mbrojtur. Ai theksoi se çdo projekt zhvillimor në Zvërnec dhe zonat përreth do të bazohet në një proces rigoroz të Vlerësimit të Ndikimit në Mjedis, në përputhje me standardet e Bashkimit Europian. Kryeministri e mbylli reagimin duke bërë thirrje që çështjet mjedisore të mos shfrytëzohen për "luftë për pushtet".
Përditësime
Parlamenti Evropian miratoi sot një amendament që shpreh shqetësim serioz për zhvillimet në zonën e mbrojtur Vjosë-Nartë. Eurodeputetët kërkuan një moratorium për të gjitha lejet e reja dhe punimet në zonat e mbrojtura, deri në përafrimin e plotë të standardeve mjedisore me Kapitullin 27 të procesit të anëtarësimit. Informacionet e mëparshme mbi rrëzimin e këtij amendamenti kanë rezultuar të pasakta.
Parlamenti Europian miratoi Amendamentin 17, që vendos një moratorium mbi lejet e reja dhe ndërhyrjet në zonat e mbrojtura. Ky vendim pason rrëzimin e Amendamentit 4 dhe kërkon përafrimin urgjent të legjislacionit për Zonat e Mbrojtura me standardet e Bashkimit Europian.
Kryeministri Edi Rama sqaroi se amendamenti i Parlamentit Europian nuk përfshin zonën e Zvërnecit, por fokusohet ekskluzivisht te zona e mbrojtur Vjosë-Nartë. Qeveria shqiptare konfirmoi se rishikimi i ligjit për zonat e mbrojtura është integruar në agjendën e negociatave me Bashkimin Europian, duke nisur një proces analitik me Komisionin Europian për harmonizimin e legjislacionit vendas me standardet e BE-së.