Sot, në orën 18:00, Partia Demokratike mbledh Këshillin Kombëtar në selinë e saj, me qëllim përcaktimin e strukturave që do të asistojnë kryetarin e partisë. Në qendër të këtij procesi qëndron gara për postin e Sekretarit të Përgjithshëm, ku do të përballen deputetët Flamur Noka dhe Saimir Korreshi.
Krahas postit të sekretarit, anëtarët e Këshillit Kombëtar do të votojnë edhe për pozicionet e nënkryetarëve. Kandidatët në garë për këto funksione janë Luciano Boçi, Belind Këlliçi, Erisa Bajazhi dhe Nikola Kedhi. Ndërkohë, Fjoralba Dizdari është kandidatja e konfirmuar për postin e sekretares për integrim.
Procesi zgjedhor pason zhvillimet e fundit në selinë blu. Ndonëse në opinion u përfol emri i Blendi Himçit si një sfidant i mundshëm i Flamur Nokës, në fletën përfundimtare të votimit rivali i tij do të jetë deputeti Saimir Korreshi.
Përditësime
Kandidatura e Saimir Korreshit është zyrtarizuar në momentet e fundit, duke kufizuar kohën për fushatë. Pavarësisht raportimeve për pakënaqësi në bazë lidhur me kandidimin e Flamur Nokës, parashikimet e brendshme e favorizojnë këtë të fundit për rikonfirmimin në postin aktual.