Deputeti demokrat Saimir Korreshi është futur në garën për postin e numrit dy të Partisë Demokratike, duke sfiduar sekretarin aktual, Flamur Nokën. Në një prononcim për mediat, gjatë procesit të votimit në Këshillin Kombëtar, Korreshi sqaroi se vendimi për këtë kandidaturë është marrë ditën e sotme dhe është një zgjedhje tërësisht e pavarur.
Duke komentuar përballjen me Flamur Nokën, Korreshi u shpreh se të dy janë figura të njohura brenda strukturave të partisë. "Tani ja fushatën do ta bëj unë me Flamurin. Jemi të dy deputetë, na njeh i gjithë Këshilli", deklaroi ai, duke shtuar se anëtarët e Këshillit Kombëtar do të vendosin përmes votës së tyre. I pyetur mbi planet e tij, Korreshi preferoi të mos jepte detaje, duke u shprehur: "Të mbarojë njëherë votimi".
Ndonëse më herët në selinë blu u përfol emri i Blendi Himçit si kandidat i mundshëm, në fletën e votimit figuron emri i Saimir Korreshit si kundërshtari i drejtpërdrejtë i Flamur Nokës.
Përditësime
Kandidati për Sekretar të Përgjithshëm të Partisë Demokratike, Saimir Korreshi, u është përgjigjur akuzave për lobim, duke i cilësuar ato si pjesë të natyrës së punës së tij përfaqësuese. Lidhur me reformimin e strukturave, Korreshi theksoi se ndryshimi është një proces i pashmangshëm, duke deklaruar: 'Nëse ka ardhur koha për ndryshim, ai do të ndodhë'.