Partia Demokratike zhvillon këtë të shtunë, duke filluar nga ora 10:00, mbledhjen e Kuvendit Kombëtar nën sloganin "Ripërtëritje". Punimet nisin me votimin e Sekretariatit Teknik dhe të Komisionit që do të drejtojë Kuvendin, i cili përbëhet nga Ivi Kaso (kryetar), Floriana Garo, Bardh Spahia, Eliona Shkreli dhe Nada Meçorpaja.
Kryetari i grupit parlamentar, Gazmend Bardhi, do të prezantojë paketën me 8 propozime për ndryshime statutore. Ndër ndryshimet kyçe është krijimi i një komisioni të posaçëm që do të filtrojë kandidaturat për deputetë dhe kryetarë bashkish përpara se ato t'i nënshtrohen votimit nga anëtarësia. Statuti i ri parashikon gjithashtu detyrimin për dixhitalizimin dhe përditësimin e regjistrit të anëtarëve çdo dy vjet.
Në rendin e ditës është zgjedhja e 200 anëtarëve të rinj të Këshillit Kombëtar, proces që zhvillohet në ambientet e Pallatit të Kongreseve. Pas konstituimit, ky Këshill do të ketë për detyrë të shqyrtojë propozimet e kryetarit Sali Berisha për ekipin e ri drejtues, përfshirë Kryesinë dhe Sekretarin e Përgjithshëm.
Programi i Kuvendit përfshin fjalën e kryetarit Sali Berisha, si dhe ndërhyrje nga të ftuar ndërkombëtarë. Hapja e punimeve është parashikuar të bëhet nga Erisa Bajaziti, përfaqësuese e diasporës në Bruksel. Mbledhja pason rikonfirmimin e Sali Berishës në krye të partisë javën e kaluar, ku ai u shpall fitues me 37 341 vota.
Përditësime
Kuvendi Kombëtar i Partisë Demokratike miratoi ndryshime statutore, të cilat ruajnë klauzolën për dorëheqjen e detyrueshme të kryetarit pas humbjeve elektorale. Ndryshimet parashikojnë gjithashtu kuota të përcaktuara për Diasporën në çdo strukturë dhe rritje të përfaqësimit gjinor në forumet drejtuese. Në zhvillimet e tjera:
- Sali Berisha u rikonfirmua në krye të PD pa asnjë kandidat rival.
- Lista e kandidatëve për anëtarë të Këshillit Kombëtar mbetet ende për t'u publikuar nga komisioni përkatës.
Në hapjen e Kuvendit Kombëtar, Partia Demokratike prezantoi një avatar digjital të Gjergj Kastriotit - Skënderbeut. Departamenti i Inteligjencës Artificiale pranë kësaj force politike bëri me dije se kostoja e realizimit të avatarit ishte 100 euro, ndërsa ky i fundit realizoi një krahasim të drejtpërdrejtë me 'Diella'-n, avatarin e përdorur më parë nga Kryeministri Edi Rama.
Kuvendi Kombëtar i Partisë Demokratike ka përfunduar punimet, duke zyrtarizuar ndryshimet statutore. Numërimi i votave për anëtarët e Këshillit Kombëtar nis sot në orën 20:00, në selinë e partisë. Gjatë sesionit, Sali Berisha prezantoi programin politik të përqendruar te rritja e pagave dhe pensioneve, lufta kundër korrupsionit dhe integrimi europian. Statuti i ri vendos kuota të reja përfaqësimi në strukturat drejtuese: 15% për Diasporën dhe 40% për gratë.