Partia Demokratike ka nisur fushatën për zgjedhjet e brendshme që do të mbahen më 23 maj. Në këto zgjedhje Sali Berisha është kandidati i vetëm për postin e kryetarit të partisë.
Një udhëzim i brendshëm i partisë përcakton se fushata ka filluar më 15 maj dhe do të zgjasë deri 24 orë para ditës së votimit. Udhëzimi rregullon të gjitha procedurat e procesit zgjedhor brenda strukturave të PD-së.
Megjithëse në garë është vetëm një kandidat, Berisha ka caktuar përfaqësues të tij në çdo komision votimi dhe numërimi. Çdo komision do të përbëhet nga tre anëtarë, ku përfshihen një nënkryetar ose kryetar i degës dhe dy anëtarë të kryesisë së degës.
Të drejtën e votimit e kanë të gjithë anëtarët e partisë që figurojnë në listat përkatëse, si dhe ata që nuk janë në lista, por që paraqesin dokumentin origjinal të anëtarësisë. Anëtarët e kryesisë dhe të këshillit kombëtar që banojnë në Tiranë do të votojnë në qendrën që do të ngrihet në selinë qendrore të PD-së.
Votimi do të fillojë në orën 08:00 dhe do të përfundojë në orën 18:00 të datës 23 maj. Numërimi i votave do të nisë brenda 30 minutash pas mbylljes së votimit. Rezultati përfundimtar pritet të bëhet publik brenda datës 24 maj.