Sekretari për Çështjet Ligjore në Partinë Demokratike, Ivi Kaso, njoftoi se ka përfunduar faza e përgatitjeve për procesin e zgjedhjes së kryetarit të partisë më 23 maj. Procesi do të zhvillohet sipas parimit një anëtar, një votë dhe do të konsiderohet si referendum i brendshëm partiak.
Në të gjithë degët e Partisë Demokratike do të ngrihen qendra votimi, të cilat do të jenë të hapura nga ora 08:00 deri në 18:00. Në degët më të mëdha, sipas nevojave, mund të krijohet më shumë se një qendër votimi për të lehtësuar pjesëmarrjen e anëtarëve.
Në total, 77 degë të Partisë Demokratike në të gjithë vendin do të marrin pjesë në këtë proces. Kaso theksoi se ky referendum përbën një ushtrim të demokracisë së drejtpërdrejtë brenda partisë.
Ai shtoi se që nga ngritja e Komisionit të Rithemelimit e deri më 23 maj, Partia Demokratike ka zhvilluar shtatë procese zgjedhore të hapura dhe të drejtpërdrejta.
Përditësime
PD miratoi fletën e votimit me pyetje specifike për kandidaturën e Sali Berishës, i cili mbetet kandidati i vetëm pasi kaloi filtrat statutore. Numri i anëtarëve me të drejtë vote ende nuk është përcaktuar. Kuvendi Kombëtar i 30 majit do të shqyrtojë ndryshime statutore me propozime të shumta në pritje.