Sipërmarrësi serb Ljubisa Karovic, 61 vjeç, ka rrëfyer përvojën dramatike të përjetuar në bordin e një avioni të kompanisë Ryanair, ku si pasojë e humbjes së presionit në kabinë, ai u thith pjesërisht nga dritarja në sediljen 11F. Në një intervistë për gazetën britanike "The Guardian", ai përshkroi çastet kur dritarja u thye pas një shpërthimi të fortë, duke shkaktuar plagë në kokë, qafë, krah dhe gjoks, ndërsa avioni fluturonte në një lartësi prej 15 mijë këmbësh dhe me shpejtësi mbi 600 km/h.
Bashkëshortja e tij, Svetlana Karovic, vlerësoi reagimin e shpejtë të udhëtarëve të tjerë, duke theksuar rolin vendimtar të një pasagjeri, i cili dyshohet të jetë me origjinë shqiptare. Ky i fundit ndihmoi në tërheqjen e Ljubisa Karovic brenda avionit dhe bllokoi dritaren e dëmtuar me një valixhe dore.
Ndërkohë, kanë dalë në pah kundërshtime lidhur me menaxhimin e situatës nga ekuipazhi. Avokati i 61-vjeçarit, Vasilis Tsiaras, pretendon se ndihma kryesore erdhi nga pasagjerët, duke akuzuar stafin e fluturimit për gjendje shoku. Kompania Ryanair i ka hedhur poshtë këto akuza, duke deklaruar se ekuipazhi zbatoi procedurat e sigurisë gjatë uljes emergjente, duke ofruar asistencën e kërkuar për pasagjerin deri në mbërritjen në tokë. Hetimet për zbardhjen e shkaqeve të këtij incidenti vijojnë ende.
Përditësime
Pasagjeri serb Karovic ka lënë spitalin dhe po vijon shërimin në një vilë në Katerini, 11 ditë pas incidentit në bordin e Ryanair. Ai vuan nga trauma psikologjike dhe përjeton «flashback» të shpërthimit. Ekzaminimet mjekësore konfirmuan djegie e mavijosje në krahun e djathtë, ndërsa pacienti mban një jakë ortopedike. Sipas raportit, një pasagjer tjetër parandaloi përshkallëzimin e situatës duke bllokuar dritaren me një çantë dore.
Avokati i Karoviç deklaroi se pasagjeri vuan nga çrregullimi i stresit post-traumatik (PTSD), pas incidentit në bordin e Ryanair. Mjekët kanë konfirmuar dëmtime fizike, përfshirë djegie dhe hematoma në zonën e kraharorit dhe nën sqetull. Sipas mbrojtjes, gjendja mendore e klientit është rënduar ndjeshëm pas ngjarjes. Karoviç po udhëtonte drejt Gjermanisë për të marrë pjesë në ditëlindjen e vëllait të tij kur ndodhi incidenti.