Ngjarja e rëndë ndodhi gjatë natës së 15 gushtit, pak pas mesnatës, kur avioni i linjës Ryanair, i cili ishte nisur nga Tirana, po kryente manovrat e uljes në aeroportin "Guglielmo Marconi" në Bolonjë, Itali.
Sipas informacioneve paraprake, shtetasi 85-vjeçar udhëtonte së bashku me familjarët e tij. Duke qenë se ai vuante nga probleme të rënda shëndetësore, për të ishte kërkuar paraprakisht asistencë mjekësore. Fatkeqësisht, gjatë fazave të fundit të uljes së avionit, gjendja e të moshuarit u përkeqësua në mënyrë kritike, duke çuar në pësimin e një arresti kardiak apo kardiocirkulator.
Menjëherë pas mbërritjes së avionit në pistë, ekipet e urgjencës mjekësore 118 ndërhynë për t'i dhënë ndihmën e parë, por përpjekjet e tyre rezultuan të pasuksesshme. Në vendngjarje mbërriti edhe Policia e Shtetit italiane, e cila kreu procedurat e nevojshme dhe ka nisur verifikimet për të dokumentuar rrethanat e plota të kësaj ngjarjeje tragjike.
Përditësime
Autoritetet italiane konfirmuan se vdekja e 85-vjeçarit shqiptar në aeroportin e Bolonjës ka ndodhur për shkaqe natyrore. Hetimet përcaktuan se ngjarja ndodhi gjatë orëve të para të datës 16 gusht.