Paskal Milo, ish-ministër i Jashtëm, komentoi të mërkurën në programin "e Drekës" në News24, të moderuar nga Ola Brukon, përplasjet publike brenda Partisë Socialiste, ku kryefjalë janë kritikat e Elisës Spiropali ndaj kryeministrit Edi Rama.
Sipas Milo-s, që nga viti 2005, PS ka hyrë në një fazë të re, ku strukturat dhe forumet partiake kanë humbur rolin qendror në vendimmarrje. Organizimi aktual ka krijuar një model me pushtet të centralizuar te kryetari, duke e portretizuar PS-në si parti-shtet, ku kryetari vendos në çdo hallkë.
Institucionet e brendshme partiake kanë rol periferik ose funksionojnë si fasadë, ndërsa koncepti i demokracisë së brendshme është zbehur. Kjo situatë ka nxjerrë në sipërfaqe pakënaqësi dhe debate të brendshme, të cilat nuk janë fenomen i ri, por reflektim i problemeve të akumuluara.
Milo theksoi se përgjegjësia nuk i takon vetëm Edi Ramës, por edhe figurave të tjera rreth tij, të cilat nuk kanë treguar kurajo apo mendësi demokratike për të shprehur mendime të ndryshme. Ai paralajmëroi se lëmshi i nisur mund të shthuret dhe të mos ndalet lehtësisht.