Në seancën e parë të sesionit parlamentar, të zhvilluar më 19 janar 2026, Kuvendi miratoi projektligjet në vetëm 20 minuta me votat e Partisë Socialiste (PS).
Deputetët e Partisë Demokratike (PD) me të mbërritur në sallë bllokuan foltoren për të mos lejuar zhvillimin normal të seancës. Kërkesa e tyre ishte që Belinda Balluku të mos ishte prezente në sallë. Sali Berisha me një iPad në dorë transmetoi live situatën në rrjetet sociale.
Mes zhurmës dhe mbivendosjes së zërit, kryetari i Kuvendit Niko Peleshi mbajti fjalën. Nga grupet parlamentare foli fillimisht Tedi Blushi i Partisë së Lirisë, i cili ripërsëriti kërkesën e opozitës.
Kreu i grupit parlamentar të PS, Taulant Balla, kritikoi opozitën për reagimin pas ftesës që Edi Rama mori nga Donald Trump. Ai u bëri thirrje atyre të marrin pjesë në mbledhjet e komisioneve për reformën territoriale dhe zgjedhore, duke theksuar se kanë kohë vetëm edhe një javë. Nëse opozita nuk merr pjesë, ndryshimet do të kalojnë me propozimet e anëtarëve të PS në këto komisione.
Pas këtyre fjalimeve, projektligjet u vunë në votim dhe kaluan me votat e PS.