Partia Demokratike ka kërkuar zyrtarisht zgjatjen e mandatit të Komisionit të Posaçëm për Reformën Administrativo-Territoriale, përmes një shkrese të dorëzuar nga bashkëkryetari i komisionit, Luçiano Boçi, drejtuar kryetarit të Kuvendit, Niko Peleshi, dhe Konferencës së Kryetarëve. Sipas opozitës, puna e komisionit nuk mund të konsiderohet e përfunduar për shkak të mospërmbushjes së objektivave të përcaktuara në projektkalendarin e punës.
Në kërkesën e saj, PD rendit disa mangësi në procesin e punës, ndër të cilat:
• Konsultimet publike të papërfunduara, përfshirë mungesën e dëgjesave në qarkun e Tiranës.
• Dëgjesat e munguara me 8 kryetarë bashkish, të cilët nuk kanë raportuar para komisionit.
• Mungesa e hartimit të dokumentit të “Analizës Paraprake” mbi sfidat e pushtetit vendor.
Opozita kërkon që puna e komisionit të vijojë edhe përgjatë muajit gusht, për të garantuar një proces shterues. Një element thelbësor i kërkesës është domosdoshmëria e marrjes së opinionit institucional nga Kongresi i Autoriteteve Lokale dhe Rajonale të Këshillit të Evropës. Sipas PD-së, ky institucion ofron ekspertizën më të specializuar në çështjet e decentralizimit dhe autonomisë vendore, dhe mendimi i tij është i pashmangshëm përpara hartimit të produktit final që do t'i paraqitet Kuvendit.
Luçiano Boçi thekson se deri tani është realizuar vetëm ngritja e faqes zyrtare të komisionit, ndërkohë që aktivitetet thelbësore që lidhen me përmbajtjen e reformës mbeten të paekzekutuara.