Kryetari i Partisë Demokratike, Sali Berisha, deklaroi sot mbështetjen për protestën e organizuar nga Koalicioni për Familjen në Ditën Ndërkombëtare të Fëmijëve. Deklarata u bë pas paraqitjes së tij në ambientet e Prokurorisë së Posaçme kundër Korrupsionit dhe Krimit të Organizuar (SPAK), në zbatim të masës “detyrim paraqitje” për çështjen “Partizani”.
Në fjalën e tij, Berisha e cilësoi si akt të shëmtuar udhëzimin e Ministrisë së Shëndetësisë dhe Mirëqenies Sociale mbi terapinë hormonale për ndryshimin e gjinisë tek 14-vjeçarët. Sipas tij, ndërhyrje të tilla para moshës 18-22 vjeç shkelin kriteret biologjike dhe sociologjike, duke i konsideruar ato si cenim të identitetit njerëzor.
Lideri i opozitës sqaroi se, për shkak të këtyre zhvillimeve, nuk do të mbahet “Foltorja” e përjavshme. Berisha theksoi se pozicionimi i tij nuk synon diskriminimin, por kërkon që vendimet mjekësore të kësaj natyre të merren vetëm pasi individi të ketë arritur moshën e përgjegjësisë ligjore.