Partia Demokratike (PD) ka krijuar një grup prej shtatë avokatësh për të ofruar asistencë ligjore për protestuesit studentorë që shoqërohen, ndalohen ose arrestohen për shkak të pjesëmarrjes në protesta. Sipas njoftimit të Sekretariatit për Çështjet Ligjore dhe Zgjedhore të PD-së, avokatët do të jenë në dispozicion 24 orë në ditë, shtatë ditë në javë.
Asistenca do të ofrohet pranë organeve të Policisë së Shtetit, Prokurorisë dhe gjykatave. Sipas njoftimit, qëllimi është të garantohen të drejtat ligjore të protestuesve dhe të zhvillohen procedurat në përputhje me legjislacionin në fuqi.
Grupi përbëhet nga Marash Logu, Eda Grimci, Adriana Kalaja, Franc Nuri, Shaqir Manjani, Besart Logu dhe Ledio Nuraj. Protestuesit që kanë nevojë për asistencë ligjore mund të telefonojnë në çdo kohë në numrin 067 482 5149.
PD-ja dhe Sekretariati për Çështjet Ligjore dhe Zgjedhore ritheksojnë rëndësinë e respektimit të të drejtave dhe lirive themelore të protestuesve, si dhe garantimit të procesit të rregullt ligjor për qytetarët që përballen me procedura policore ose gjyqësore.