Partia Demokratike e Kosovës ka shprehur kundërshtimin ndaj paralajmërimeve për rritje të tarifave të energjisë elektrike deri në 21%. Sipas një komunikate për media, kjo paraqet goditje të rëndë ndaj familjeve kosovare.
PDK thekson se qytetarët po përballen me rritje të vazhdueshme të çmimeve, paga të ulëta dhe kosto jetese gjithnjë e më të larta. Një rritje e tillë do ta thellonte krizën sociale dhe ekonomike në vend. Shumë familje janë në kufijtë e mbijetesës financiare, ndërsa ky propozim do të sillte pasiguri shtesë, rritje të varfërisë dhe cenim të mirëqenies së tyre.
Partia e konsideron të papranueshme transferimin e barrës së keqmenaxhimit dhe dështimeve në sektorin e energjisë mbi qytetarët. Energjia elektrike është nevojë bazike dhe trajtimi i saj si i tillë është detyrim institucional. Për këto arsye, PDK kundërshton fuqishëm çdo propozim të tillë.
PDK u bën thirrje Qeverisë së Kosovës dhe Zyrës së Rregullatorit për Energji (ZRRE) të refuzojnë këto kërkesa dhe të veprojnë në mbrojtje të interesit publik dhe qytetarëve.
Partia do të vazhdojë angazhimin për zbardhjen e aferave në sektorin e energjisë, rritjen e llogaridhënies institucionale dhe mbrojtjen e qytetarëve nga politika që rëndojnë jetën e tyre të përditshme.