Rinia Demokratike e Kosovës mbajti të enjten një aksion simbolik para Ministrisë së Ekonomisë në Prishtinë, kundër kërkesës së KESCO-s për rritje të çmimit të energjisë elektrike me 21% ose 21,3%, mungesës së saj dhe faturave të larta.
Gjatë aksionit, të rinjtë vendosën para objektit një faturë të përmasave të mëdha, e cila paraqet shpenzimet mujore të një familjeje mesatare me dy anëtarë të punësuar. Në emër të rinisë foli Trim Syla, kryetari i Degës në Prishtinë.
Syla deklaroi: "Sot s’kemi ardhur me pankarta. Kemi ardhur me një faturë. Një faturë që po e ngulfat jetën e qytetarëve çdo muaj. Një familje në Kosovë, me 1000 euro të ardhura mujore, ka 1085 euro shpenzime bazike. Pa luks. Pa pushime. Pa kursime. Vetëm bukë. Vetëm rrymë. Vetëm ngrohje. Vetëm qira, ilaçe dhe shkollë për fëmijët. Minus 85 euro çdo muaj."
Ai sqaroi se fatura mujore për energji elektrike arrin 175 euro dhe rritja e çmimit nuk është reformë, por goditje ndaj familjeve dhe shtytje drejt varfërisë. Syla shtoi se qytetarët varfërohen dhe vidhen, pasi rriten çmimet e rrymës, bukës dhe transportit, ndërsa pagat mbeten të pandryshuara.
"Energjia nuk është luks. Është nevojë bazike", nënvizoi ai. Fatura simbolike do të qëndrojë para ministrisë deri në marrjen e përgjegjësisë. Aktivistët paraqitën gjithashtu një tabelë me çmimet e produkteve të përditshme, ku shkruhej: "Jetojmë me borxhe! Rritja 21% e rrymës na varfëron edhe më shumë".
Syla përfundoi: "Kosova nuk mund të qeveriset duke e ftohur shtëpinë e qytetarit për ta ngrohur propagandën e Albin Kurtit."