Kryetari i Kuvendit, Niko Peleshi, mori pjesë në Konferencën e Kryetarëve të Parlamenteve të vendeve anëtare të Bashkimit Europian, të zhvilluar në Danimarkë më 4 maj. Konferenca mblodhi drejtues të parlamenteve nga vendet anëtare dhe kandidate për të diskutuar sfidat aktuale dhe të ardhshme të sigurisë së kontinentit dhe zgjerimin e BE-së.
Gjatë punimeve, Peleshi mbajti fjalë në sesionin e parë me temë "Europa në një rend botëror që ndryshon: Siguria, zgjerimi dhe roli i parlamenteve". Ai ndau qëndrimet e Shqipërisë mbi zhvillimet gjeopolitike, zgjerimin e BE-së dhe perspektivën europiane të Shqipërisë dhe Ballkanit Perëndimor.
Peleshi theksoi se Europa ndodhet në një moment kritik përballë sfidave si rivaliteti strategjik, kërcënimet hibride, presionet ekonomike dhe konfliktet që ndikojnë drejtpërdrejt sigurinë e kontinentit. Duke iu referuar agresionit të Russisë ndaj Ukrainës dhe tensioneve në Lindjen e Mesme, ai nënvizoi se pasiguria nuk mbetet e izoluar, por përhapet përtej kufijve.
Ai e cilësoi zgjerimin e Bashkimit Europian si domosdoshmëri gjeopolitike dhe instrument kyç për forcimin e stabilitetit dhe sigurisë. Sipas tij, lënia e Ballkanit Perëndimor jashtë strukturave europiane krijon hapësira për ndikime të jashtme dhe pasiguri, ndërsa një Europë e bashkuar është më e fortë dhe më rezistente.
Peleshi theksoi rëndësinë e një perspektive të qartë dhe të besueshme për vendet e rajonit si nxitje të fuqishme për reforma dhe konsolidimin e institucioneve demokratike. Ai vuri në dukje potencialin që sjell Ballkani Perëndimor për BE-në, përfshirë fuqi punëtore të re, pozicion strategjik dhe burime të rëndësishme energjetike.
Në fjalën e tij, kryetari i Kuvendit nënvizoi se procesi i zgjerimit duhet të mbetet i bazuar në meritë, por njëkohësisht të mbështetet nga një qasje e vendosur.