Pentagoni krijoi në prill 2026 Zyrën për Mbështetjen Teknologjike (TSO), një strukturë që synon të pengojë përparimin teknologjik të vendeve që konsiderohen kërcënim për epërsinë ushtarake të Shteteve të Bashkuara. Sipas një investigimi të POLITICO-s, puna e agjencisë përfshin zhvillimin e mjeteve për sulme kibernetike, planifikimin e operacioneve mashtruese dhe gjetjen e mënyrave për t’ua kufizuar rivalëve qasjen në teknologji me rëndësi ushtarake.
TSO-ja u krijua duke bashkuar dy programe sekrete të Pentagonit, të cilat që nga viti 2023 kishin zhvilluar veprimtari të ngjashme në shkallë më të vogël. Synimi është zgjerimi dhe bashkërendimi i këtyre veprimtarive në një strukturë të vetme. Një shembull i përmendur në raport është mashtrimi i kundërshtarëve për t’i bërë të instalojnë në sistemet e tyre të armatimit pjesë me defekte, të përgatitura qëllimisht.
Sipas burimeve të cituara nga POLITICO, TSO-ja nuk ka autoritet ligjor për të kryer vetë operacione të fshehta. Ajo bashkëpunon me drejtues ushtarakë dhe të inteligjencës për të përgatitur mjete e strategji që mund të përdoren në operacione të tilla. Objektivi është të vonohet ose të pengohet zhvillimi i teknologjive që mund t’u japin kundërshtarëve të SHBA-së epërsi në rast të një konflikti të madh ushtarak. Disa zyrtarë të intervistuar e kanë cilësuar nismën të nevojshme, duke përmendur përdorimin e inteligjencës artificiale, dronëve dhe teknologjive të tjera moderne nga shtete të ndryshme.
Krijimi dhe drejtimi i agjencisë
Nisma u drejtua nga zëvendëssekretari i Mbrojtjes Steve Feinberg, me ndihmën e këshilltarit të tij Tom Rakusan, ish-punonjës i shërbimeve të fshehta të CIA-s, me përvojë në teknologjitë e reja. Diskutimet për zgjerimin e programeve nisën në fillim të vitit 2025. Në vjeshtë u hartua një dokument që shqyrtonte mundësitë për bashkimin dhe zgjerimin e tyre.
Fillimisht u shqyrtua vendosja e programeve nën U.S. Cyber Command, por më pas u rekomandua krijimi i një agjencie të veçantë, me buxhet dhe kompetenca të veta për prokurime. Kjo do t’i mundësonte TSO-së të siguronte më shpejt teknologji nga sektori privat dhe të vlerësonte se cilat sisteme ushtarake të vendeve të tjera përbëjnë rrezikun më të madh për SHBA-në. Sipas një ish-zyrtari të Pentagonit, krijimi i saj synon gjithashtu përqendrimin e më shumë kontrollit mbi disa programe të inteligjencës në drejtimin e lartë të Departamentit të Mbrojtjes.
Feinberg nënshkroi dokumentin e krijimit më 14 prill 2026. Gjatë verës, drejtuesit e Pentagonit emëruan Grant Hundley-n, ish-oficer të forcave speciale të Trupave Detare amerikane, drejtor të agjencisë. William Nelson, zyrtar karriere i ushtrisë amerikane, u përzgjodh për një rol në mbikëqyrjen e veprimtarive të ndjeshme dhe programeve speciale të inteligjencës.
Buxheti dhe kontratat e mundshme
Buxheti i TSO-së nuk është bërë publik. Një ish-zyrtar i lartë i inteligjencës së Pentagonit vlerëson se kontratat sekrete të mundshme mund të kalojnë 1.5 miliardë dollarë; kjo nuk është shumë e konfirmuar zyrtarisht. Sipas Albeu-t, dy ish-zyrtarë të Pentagonit dhe një zyrtar i sigurisë kombëtare thanë se agjencia u ka shprehur disa kompanive të mbrojtjes interesimin për mjete të avancuara të sulmeve kibernetike. Albeu raporton gjithashtu se TSO-ja pritet të ndihmojë në bashkërendimin e teknologjive të reja dhe në lidhjen e kompanive private me programe të ndryshme të inteligjencës.