Pas aksidentit në autostradën Tiranë-Durrës, ku një minibus i linjës Berat-Tiranë doli nga rruga dhe u përmbys, Spitali Universitar i Traumës (SUT) ka përditësuar informacionet mbi shëndetin e të dëmtuarve. Sipas njoftimit, 5 pacientë janë larguar nga spitali pas trajtimit, ndërsa një tjetër pritet të largohet gjatë ditës.
Në repartin e Reanimacionit vazhdojnë të mbahen nën monitorim intensiv dy persona:
- Një 8-vjeçar, me parametra jetësorë stabël.
- Një shtetase 56-vjeçare (me nënshtetësi çeke dhe origjinë vietnameze), e cila paraqitet në gjendje të rëndë shëndetësore për shkak të dëmtimeve të shumta, pavarësisht parametrave stabël.
Ndërkohë, një 14-vjeçar po merr trajtim në pavijon për dëmtime në gjymtyrët e poshtme. Pacientët e tjerë që i janë nënshtruar ndërhyrjeve kirurgjikale mbeten nën vëzhgim në Urgjencë, me gjendje të stabilizuar. Mes tyre është edhe një shtetase çeke me origjinë vietnameze, 20 vjeçe.
Aksidenti, i cili shkaktoi 12 të plagosur dhe vdekjen e shoferit Redion Hasimi (36 vjeç), është nën hetim. Dyshimet paraprake të grupit hetimor sugjerojnë se drejtuesi mund të ketë pësuar arrest kardiak, pasi nuk janë konstatuar shenja frenimi apo tejkalim shpejtësie.
Përditësime
Autoritetet kanë përditësuar informacionet lidhur me aksidentin në autostradë:
- Policia e Shtetit ka konfirmuar se shoferi nuk tejkaloi normat e shpejtësisë në momentin e përplasjes.
- Sipas njoftimit të fundit mjekësor, 6 pacientë janë larguar nga spitali, ndërsa gjyshja e 8-vjeçarit të përfshirë në aksident vijon të jetë në gjendje kritike për jetën, me rrezik për amputimin e gjymtyrëve.