Në kuadër të Lojërave Mesdhetare “Taranto 2026”, kombëtarja e Kosovës në volejboll për femra ka vazhduar rrugëtimin e saj me një fitore të rëndësishme përballë Maqedonisë së Veriut. Ndeshja përfundoi me rezultat 3:1 në sete, ku vashat kosovare triumfuan me shifrat 30:28, 25:17, 19:25 dhe 25:16.
Kjo përfaqësuese ka regjistruar deri më tani dy fitore, përkatësisht ndaj Maqedonisë së Veriut dhe Algjerisë, si dhe një humbje përballë Greqisë. Skuadra pritet të zhvillojë nesër ndeshjen vendimtare ndaj Turqisë, e cila do të përcaktojë fatin e kalimit në fazën tjetër të garës.
Nga ana tjetër, kombëtarja e Kosovës në volejboll për meshkuj, e cila merr pjesë për herë të parë në këtë aktivitet sportiv, ka pësuar humbje ndaj Egjiptit. Takimi përfundoi me rezultatin 3:0 në sete (25:12, 25:19 dhe 25:17) për ekipin egjiptian. Përfaqësuesja e meshkujve, e cila drejtohet nga trajneri malazez Darko Prebiraçeviç, vijon përvojën e saj historike në këto Lojëra Mesdhetare.
Përditësime
Kombëtarja e meshkujve e Kosovës në volejboll regjistroi humbjen e dytë në Lojërat Mesdhetare Taranto 2026, duke u mposhtur nga Spanja me rezultatin 3:0 në sete. Ekipi i drejtuar nga Darko Prebiraçeviç do të kërkojë pikët e para në përballjen e radhës ndaj Turqisë, e cila është caktuar të zhvillohet të martën.
Përfaqësuesja e volejbollit të femrave të Kosovës shënoi një sukses historik në debutimin e saj në Lojërat Mesdhetare. Selektori Lorik Ilazi u bë trajneri i parë në sportet kolektive të Kosovës që arrin 2 fitore në këtë aktivitet prestigjioz. Aktualisht, ekipi renditet në vendin e tretë në grup me 6 pikë të grumbulluara pas tri ndeshjeve të zhvilluara.