Skuadra e Lubotenit nga Ferizaji ka fituar Kupën e Kosovës në volejboll. Në finalen e zhvilluar të dielën në Pallatin e Sporteve 1 Tetori në Prishtinë, Luboteni mundi Dritën e Gjilanit me rezultat 3-0 në sete.
Luboteni fitoi setin e parë me 25:21, të dytin me 25:20 dhe të tretin me 25:21. Kjo paraqitje e siguroi trofeun për skuadrën ferizajase.
Lojtari më i vlefshëm i finales, Ahmed Jaser i Lubotenit, mori çmimin MVP. Trofeun e dorëzoi sekretari i përgjithshëm i Federatës së Volejbollit të Kosovës, Valon Nikqi.
Medaljet e vendit të dytë për Dritën u ndanë nga deputetja e Kuvendit të Kosovës Liza Gashi, anëtarja e Bordit Antigone Veseli dhe anëtari i Bordit Gëzim Brahimi.
Medaljet e arta për fituesit u dorëzuan nga drejtori i përgjithshëm i Policisë së Kosovës Gazmend Hoxha, drejtori i Urbanizmit në Ferizaj Arbër Bytyçi dhe nënkryetarja e Federatës Emine Reka.
Kupa për kapitenin e Lubotenit, Shqipron Krasniqi, u dorëzua nga presidenti i Federatës së Volejbollit të Kosovës Bahri Gjinovci.