Kryesia e Partisë Socialiste u mblodh mëngjesin e 3 marsit 2026 në orën 9:00 në Tiranë, nën drejtimin e kryeministrit Edi Rama. Mbledhja zgjati vetëm 30 minuta dhe kishte kryesisht karakter organizativ.
Gjatë diskutimeve, Rama kërkoi nisjen e takimeve me strukturat dhe mbështetësit në terren, shtrimin e dialogut me bazën socialiste, përqendrimin në bashki të caktuara dhe përgatitjen për pasojat ekonomike nga lufta në Lindjen e Mesme. Ai paralajmëroi mbajtjen e zgjedhjeve brenda partisë në qershor. Nuk u caktua datë për Asamblenë Kombëtare të PS.
E pranishme ishte edhe Belinda Balluku, e shkarkuar pak ditë më parë nga posti i zëvendëskryeministres dhe ministres së Infrastrukturës dhe Energjisë. Balluku ndodhet nën hetim nga SPAK për korrupsion dhe prokuroria ka kërkuar arrestimin e saj. Këshilli i Mandateve ende nuk ka vendosur për imunitetin e saj.
Opozita ka kërkuar vazhdueshëm heqjen e imunitetit të Ballukut. Të hënën, ajo dorëzoi raportin në Kuvend për anëtarët e Këshillit të Mandateve, që ish-zëvendëskryministrja të përballet me drejtësinë si qytetare e thjeshtë.
Kjo mbledhje vjen pas takimit të zgjeruar të Grupit Parlamentar të PS dhe ndryshimeve të forta në Qeveri.
Përditësime
Kryesia e PS miratoi propozimet për ndryshime në qeveri:
- Besfort Lamallari në Ministrinë e Brendshme;
- Ferit Hoxha në Punët e Jashtme;
- Albana Koçiu, zëvendëskryeministre;
- Enea Karakaçi në Energji dhe Infrastrukturë;
- Ermal Nufi në Mbrojtje;
- Erjona Ismaili në Marrëdhënie me Parlamentin;
- Toni Gugu në Drejtësi.
Afati përfundimtar për votimin e imunitetit të Ballukut në seancë është 12 marsi. Ulsi Manja do të paraqesë raportin e mazhorancës.
Elisa Spiropali ishte e pranishme në mbledhje.
Burime nga PS e cilësuan mbledhjen rutinë dhe të hershme lidhur me datën e Asamblesë.