Përkujtohet 27-vjetori i rënies së Agim Ramadanit në Betejën e Koshares

Në Prishtinë u mbajt akademi përkujtimore me rastin e 27-vjetorit të rënies së heroit të Kosovës Agim Ramadani dhe Ditës së Dëshmorëve të Betejës së Koshares. Ngjarja u zhvillua në Sallën e Kuqe të Pallatit të Rinisë, ku morën pjesë familjarë, bashkëluftëtarë, përfaqësues institucionalë dhe qytetarë.

Agim Ramadani, i njohur me nofkën Katana, lindi më 3 maj 1963 në Zhegër të Gjilanit. Ai u formua si ushtarak në Akademinë Ushtarake në Zagreb dhe ishte një nga hartuesit kryesorë të planit për thyerjen e kufirit në Koshare. Përveç karrierës ushtarake, ai ishte poet dhe piktor. Rënia e tij më 9 prill 1999 shënoi një moment kyç në luftën çlirimtare të UÇK-së.

Nënkryetari i parë i Kuvendit të Kosovës, Ardian Gola, tha se fryma e betejës vazhdon të jetë e pranishme në jetën e përditshme. Ai theksoi se thyerja e kufirit shqiptaro-shqiptar ishte arritja më e madhe, jo vetëm operacion ushtarak, por ndryshim në vetëdijen kolektive.

Në emër të Qeverisë, ministri i Rinisë dhe Sportit, Blerim Gashani, vlerësoi Ramadanin si simbol të guximit dhe sakrificës. Ai e cilësoi UÇK-në si shprehjen më të lartë të rezistencës popullore kundër shtypjes.

Ministrja e Drejtësisë, Donika Gërvalla, e përshkroi Ramadanin si figurë të rrallë dhe shumëdimensionale, strateg, poet dhe piktor. Ajo theksoi se beteja në Koshare hoqi gurin e kufirit mes shqiptarëve dhe se liria arrihet me sakrificë dhe mbrohet me dinjitet.

Kryetari i Aleancës për Ardhmërinë e Kosovës, Ramush Haradinaj, rikujtoi betimin e Ramadanit për të mos vdekur pa luftuar. Ai vlerësoi rolin e tij së bashku me Sali Çekaj dhe Xhemajl Fetahaj, duke përkujtuar edhe dhjetëra luftëtarë të tjerë të rënë.

Kryetari i Lidhjes Demokratike të Kosovës, Lumir Abdixhiku, e cilësoi Ramadanin si personalitet unik, ku bashkoheshin ndjeshmëria e artistit dhe vendosmëria e luftëtarit.