Në degën e Partisë Demokratike në Shkodër ka nisur me përleshje fizike dhe kërcënime fushata e zgjedhjeve të brendshme. Përkrahës dhe kandidatë u përplasën me grushte në prani të kreut politik të qarkut, Luciano Boçi.
Shkak u bë përjashtimi i disa kandidatëve vendorë dhe mbajtja vetëm e dy emrave të përzgjedhur nga Tirana. Ndër të përjashtuarit ishte një drejtor në bashkinë e drejtuar nga Benet Beci.
Komenti i Roland Bejkos
Analisti Roland Bejko, i ftuar në emisionin “Ora e fundit”, deklaroi se tensionet në Partinë Demokratike janë të larta, jo vetëm në bazë, por edhe në degët vendore. “PD është e ndarë, sepse ata që janë të fortë, bëjnë ligjin. Berisha ka larguar intelektualët, ndaj ndodhin konfliktet. PD do të jetë në konflikt të vazhdueshëm”, tha ai, duke theksuar mungesën e respektit ndaj statutit dhe kontributit të anëtarëve.
Komenti i Artur Nurës
Gazetari dhe analisti Artur Nura vlerësoi se konflikti buron nga vendosja e Luciano Boçit si drejtues politik, i cili nuk është nga Shkodra, por nga Elbasani. Sipas tij, në parti mbizotëron fryma e komandimit dhe militantizmit, jo ajo demokratike. “Berisha do sejmenë, që të jenë dakord dhe të mos thonë asnjë fjalë kundër. [...] Njerëzit e kanë kuptuar se me Berishën nuk shkohet në pushtet”, deklaroi Nura, duke theksuar se Shkodra është qytet me intelektualë.