Pas reshjeve intensive që përfshiu Durrësin në orët e para të mëngjesit, rrugët u mbushën me ujë, duke krijuar vështirësi të mëdha në lëvizjen e këmbësorëve dhe automjeteve.
Uji mbuloi pjesërisht korsitë e qarkullimit. Drejtuesit e mjeteve u detyruan të ecin me shpejtësi të reduktuar për të shmangur defektet apo aksidentet.
Këmbësorët u përballën me pengesa, veçanërisht në kryqëzimet e rrugëve, dhe disa veshën çizmet.
Pusetat, një pjesë të bllokuara, nuk arritën të përballonin sasinë e madhe të ujit brenda një kohe të shkurtër.
Reshjet e dendura rikthyen problematikën e infrastrukturës së kullimit në qytetin bregdetar, e cila sa herë intensiteti i shiut rritet, nxjerr në pah problemet e saj. Me ndërprerjen e reshjeve, situata pritet të kthehet në normalitet.