Përmbytjet e shkaktuara nga shirat e rrëmbyeshëm musonikë kanë goditur rëndë shtetin e Assamit në Indinë verilindore, duke shkaktuar humbjen e jetës së 97 personave. Ky episod i reshjeve konsiderohet si një ndër më të rëndët e viteve të fundit, duke lënë rreth 170 mijë banorë të prekur nga përmbytjet e menjëhershme dhe rrëshqitjet e dheut.
Sipas autoriteteve lokale, mijëra banorë janë detyruar të largohen nga shtëpitë e tyre për t'u strehuar në kampe emergjente. Dëmet materiale janë të konsiderueshme, ku mbi 140 mijë hektarë tokë bujqësore janë përmbytur, një sipërfaqe kjo rreth një herë e gjysmë më e madhe se ajo e qytetit të Parisit. Në distriktin Sivasagar, një nga zonat më të goditura, raportohet për shtëpi të zhytura pjesërisht, pemë të shkulura dhe automjete të mbuluara nga balta.
Kryeministri i shtetit të Assamit, Himanta Biswa Sarma, publikoi një mesazh ngushëllimi për familjen e një 13-vjeçari, i cili humbi jetën ndërsa përpiqej të shpëtonte qenin e tij nga ujërat në rritje. “Asnjë prind nuk duhet të detyrohet kurrë t’i thotë lamtumirë fëmijës së tij”, deklaroi Sarma.
Ministri indian i Shëndetësisë, J. P. Nadda, gjatë një vizite në zonat e prekura, theksoi shkallën e lartë të shkatërrimit dhe vështirësitë për rikthimin e normalitetit. “Fshatrat u përmbytën njëri pas tjetrit”, deklaroi ai para gazetarëve. Përmbytjet janë një fenomen i përsëritur në Assam gjatë sezonit të musoneve, i cili zgjat nga qershori deri në shtator, periudhë gjatë së cilës lumi Brahmaputra dhe degët e tij dalin shpesh nga shtrati për shkak të reshjeve intensive.