Përparim Rama, kryetar i Prishtinës, ka reaguar në Facebook për zhvillimet në Skenderaj, duke akuzuar Albin Kurtin, kryeministër në detyrë, se e ka përdorur atë si skenë për manipulim politik.
Rama shkruan se Skenderaj u shfrytëzua për të nxitur përçarje mes qytetarëve, për të krijuar tensione artificiale dhe për të prodhuar një klimë konfrontimi politik. Ai shton se një kryeministër që përdor institucionet, policinë dhe retorikën për të ndarë qytetarët dhe për të thelluar polarizimin shoqëror nuk po qeveris, por po manipulon.
Rama përmend refuzimin e Kurtit për t’u përgjigjur ftesës së Prokurorisë Speciale të Republikës së Kosovës. Ai shkruan se Kurti e sheh veten mbi ligj dhe se ai është ligji.
Sipas Ramës, mbushja e Drenicës me forca policore tregon nevojën e Kurtit për të projektuar autoritet dhe për të ushqyer një logjikë hakmarrjeje politike. Ai e quan provokim të Drenicës dhe etiketimin e kryetarit të saj, Sami Lushtakut, si “Serbia” një akt të ulët, që rrezikon paqen sociale dhe shtyn qytetarët drejt përçarjes dhe konfliktit.
Rama vlerëson se ky tensionim i qëllimshëm dhe tentativat për destabilizim politik janë të rrezikshme për popullin dhe shtetin e Kosovës. Ai përfundon se Drenica dhe Kosova nuk e meritojnë këtë.
Gjatë ditës së djeshme, në një kafene të Skenderajt u rrah zëvendësministri i Financave, Hysni Mehani, i cili tha se u rrah nga Sami Lushtaku dhe truprojat e tij.