Kryetari i Prishtinës, Perparim Rama, ka adresuar kritika të ashpra ndaj Qeverisë së Kosovës, duke e fajësuar atë për përkeqësimin e gjendjes ekonomike në vend. Përmes një reagimi publik, Rama vlerësoi se politikat e ndjekura nga kabineti i Albin Kurtit kanë sjellë izolim ndërkombëtar dhe masa ndëshkuese, duke çuar në humbjen e fondeve nga Bashkimi Evropian.
Sipas Ramës, fondet e destinuara për rajonin po ridrejtohen drejt Shqipërisë, Malit të Zi dhe Maqedonisë së Veriut, ndërsa Kosova mbetet jashtë këtyre mundësive. Ai theksoi se qasja e qeverisë ndaj partnerëve ndërkombëtarë, duke përmendur refuzimin e projektit të gazit nga ana e SHBA-ve, ka dëmtuar seriozisht pozitën e vendit.
Si tregues të kësaj krize, kryetari i kryeqytetit përmendi mbylljen e fabrikës së qumështit Vita, duke paralajmëruar se pasojat po ndikojnë drejtpërdrejt te punëtorët, fermerët dhe pronarët e bizneseve. Rama vlerësoi se qeveria po përpiqet të zëvendësojë mundësitë për zhvillim ekonomik me masa si ato të ndihmave të përkohshme prej 100 eurosh, duke e cilësuar këtë si një qasje të dështuar që cenon dinjitetin ekonomik të qytetarëve.
Në reagimin e tij, Rama e cilësoi situatën si një fatkeqësi që vjen si rezultat i një qeverie, sipas tij, autokrate, të paaftë dhe papunëtore, duke shtuar se vendi po kthehet në praktika të periudhave të vështira të së kaluarës sa i përket trajtimit të fuqisë punëtore.