Përparim Rama, kryetar i Komunës së Prishtinës, ka përshëndetur nisjen e hetimeve nga Prokuroria Speciale e Republikës së Kosovës lidhur me ekspozitën “Masakrat në Kosovë 1998–1999”, të organizuar nga Shkëlzen Gashi.
Rama e ka cilësuar këtë veprim si qasje institucionale të duhur. Ai pret që organet e drejtësisë të veprojnë me zero tolerancë ndaj çdo përpjekjeje për të shtrembëruar ose manipuluar të vërtetën historike të Kosovës.
Në deklaratën e tij, Rama shkruan: “E vërteta historike e Kosovës nuk është çështje interpretimi, por themel i pandryshueshëm i drejtësisë dhe i dinjitetit kombëtar. Çdo përpjekje për ta shtrembëruar apo manipuluar atë duhet të trajtohet me përgjegjësi të lartë institucionale.”
Ai shton: “Është koha e fundit që individë jokompetentë dhe të papërgjegjshëm të ndalohen të manipulojnë periudhat më të dhimbshme dhe më të rëndësishme të historisë sonë. Historia nuk është hapësirë për eksperimente, as për narracione të rreme.”
Reagimi i Ramës vjen pas aktivizimit të Prokurorisë Speciale për këtë ekspozitë.