Në samitin e ministrave të Jashtëm të G7, të zhvilluar më 28 mars 2026, u regjistruan tensione mes SHBA dhe Bashkimit Evropian për qëndrimin ndaj Rusisë dhe luftës në Ukrainë. Sipas burimeve diplomatike dhe Axios, shefja e diplomacisë evropiane, Kaja Kallas, i drejtoi një pyetje drejtpërdrejt sekretarit amerikan të Shtetit, Marco Rubio, duke e sfiduar se kur SHBA do të ashpërsojnë qëndrimin ndaj Moskës.
Kallas kujtoi se një vit më parë, në të njëjtin forum, Rubio kishte paralajmëruar masa më të rrepta nëse Rusia pengonte përpjekjet për të dhënë fund luftës. "Ka kaluar një vit dhe nuk ka ndryshuar asgjë", thuhet se ka thënë ajo, duke kërkuar një afat të qartë për durimin amerikan.
Rubio reagoi i irrituar, duke ngritur zërin. Ai theksoi se SHBA po bëjnë gjithçka të mundur për të ndaluar luftën, komunikojnë me të dyja palët dhe vazhdojnë mbështetjen ushtarake e informative për Ukrainën. "Nëse mendoni se mund të bëni më mirë, vazhdoni vetë. Do të tërhiqemi", u përgjigj ai, sipas burimeve të pranishme.
Pas këtij shkëmbimi të nxehtë, ministrat evropianë ndërhynë për të theksuar nevojën për vazhdim të bashkëpunimit diplomatik me pjesëmarrjen e SHBA. Në fund të takimit, Kallas dhe Rubio zhvilluan një bisedë të shkurtër private për të ulur tensionet.
Pala amerikane e minimizoi incidentin si një "shkëmbim sinqertë pikëpamjesh". Vetë Rubio, në një deklaratë për shtyp pas takimit, mohoi praninë e tensioneve, duke e cilësuar diskutimin si pjesë e bashkëpunimit dhe respektit të ndërsjellë. Kryeqytetet evropiane shprehin rezervë ndaj rolit amerikan, për shkak të fokusit në rritje ndaj krizave të tjera, si ajo në Lindjen e Mesme.
Përditësime
Marco Rubio deklaroi në konferencën e shtypit: "Këto takime shpesh kanë të bëjnë me falënderimin e Shteteve të Bashkuara për rolin që kemi luajtur dhe vlerësimin e rolit që kemi provuar të luajmë si ndërmjetës në këtë luftë midis Rusias dhe Ukrainës".
- Udhëheqësit evropianë shprehin shqetësim për bisedimet e paqes të udhëhequra nga SHBA midis Ukrainës dhe Rusias.
- SHBA kanë dhënë përjashtime për shitjen e naftës ruse për shkak të luftës në Iran, duke lejuar shitje me çmime të larta.