Debati është nxitur pas njoftimit të kryetarit të Komunës së Prishtinës, Përparim Rama, se institucioni që ai drejton ka përkrahur operatorët në procesin e financimit për blerjen e mjeteve të reja të transportit publik. Sipas Ramës, këta 15 autobusë elektrikë dhe 2 tramvaj do të jenë modernë dhe 100% elektrikë.
Nga ana tjetër, ministri në detyrë i Financave, Hekuran Murati, ka reaguar përmes rrjeteve sociale duke deklaruar se Komuna e Prishtinës nuk ka ndjekur procedurat e parapara me Ligjin për Partneritet Publiko-Privat. Sipas Muratit, çdo marrëveshje apo kontratë e nënshkruar në lidhje me këtë çështje është në shkelje të dispozitave ligjore në fuqi.
Murati u ka bërë thirrje organeve të rendit që të ndërmarrin veprime sa më parë për të parandaluar atë që ai e cilësoi si keqpërdorim të parasë publike. Në përgjigje, Rama ka ironizuar qëndrimin e ministrit duke e quajtur atë “bllokues” të projekteve për kryeqytetin.
“U lajmëru bllokuesi! Me punu s’po ja u don. Po për me blloku, çoheni edhe natën”, ka shkruar Rama në rrjetet sociale.
Përditësime
Kryetari i Komunës së Prishtinës, Përparim Rama, ende nuk ka përcaktuar një afat për vënien në funksion të autobusëve dhe tramvajve të rinj. Ndërkohë, Komuna e Prishtinës dhe Ministria e Financave kanë refuzuar të komentojnë përplasjen institucionale lidhur me këtë çështje. Bekim Salihu nga Instituti GAP ka kritikuar të dy palët, duke e konsideruar reagimin e ministrit të ekzagjeruar dhe duke e akuzuar kryetarin Rama për mungesë transparence.