Po mbahet sot seanca e radhës në Kuvendin e Shqipërisë, ku deputetët e opozitës dhe mazhorancës u përplasën në lidhje me aktet normative për miratimin e ligjeve në kuadër të procesit të anëtarësimit në BE.
Kreu i grupit parlamentar të PS-së, Taulant Balla, deklaroi se që nga fillimi i legjislaturës në fund të shtatorit janë miratuar 23 ligje për përafrimin e legjislacionit me kriteret para kushteve të anëtarësimit. Ai theksoi se PD nuk ka dhënë asnjë votë pro për këto ligje. "Sot, ju dashnorët më të rinj të procesit të anëtarësimit të Shqipërisë në BE, do t’ju jap një fakt që është më domethënës... Në asnjërin prej tyre nuk gjendet një votë pro e PD. Këtu nuk janë ligjet tona, por ligjet e Shqipërisë për procesin e anëtarësimit", u shpreh Balla.
Kreu i grupit parlamentar të PD-së, Gazment Bardhi, replikoi duke akuzuar mazhorancën se shkel rregulloren e Kuvendit. Ai tha se grupi i PD-së ka kërkuar disa herë në konferencën e kryetarëve të grupeve listën e draftligjeve që duhen miratuar për integrimin në BE, por mazhoranca nuk e ka vënë në dispozicion pas 6 muajsh. "Në çdo seancë ju po shkelni rregulloren... Kanë kaluar 6 muaj dhe ju nuk denjoni të informoni opozitën", deklaroi Bardhi.
Kryetari i Kuvendit, Niko Peleshi, u përgjigj Bardhit duke kujtuar se palët kanë rënë dakord që mocioni të mbahet në fillim të sesionit të dytë dhe të bashkohet me progresraportin. Ai kërkoi përdorimin e fjalorit të duhur dhe shtoi se sa i përket listës së projektligjeve, nuk fshihet asnjë listë në zyrën e Kuvendit. "Nuk besoj se ekziston ndonjë deputet që nuk ka qenë i informuar për projektligj", tha Peleshi.