Atmosfera në prag të ndeshjes së 1/8 së finaleve të Botërorit mes Francës dhe Paraguajit, e cila do të zhvillohet në Philadelphia, është tensionuar pas komenteve të bëra nga dy ish-lojtarë legjendarë. Debati nisi nga deklaratat e Christophe Dugarry, kampion bote në vitin 1998, i cili e konsideroi skuadrën paraguajane si të paaftë.
"Paraguaji do të poshtërohet, do të masakrohet. Do të duan të mbrohen sepse janë të paaftë. Në sulm janë një dështim, një katastrofë", deklaroi Dugarry.
Ish-portieri i Paraguajit, José Luis Chilavert, iu kundërpërgjigj Dugarry-t përmes rrjetit social X: "Christophe, ke të drejtë. Në Botërorin e vitit 1998 u përballëm me francezët dhe tani Paraguai do të përballet me një skuadër nga Afrika". Kjo deklaratë është kritikuar ashpër nga mediat ndërkombëtare dhe ato franceze, duke u cilësuar si raciste dhe diskriminuese për shkak të natyrës multietnike të përfaqësueses franceze.
Kjo nuk është hera e parë që 60-vjeçari Chilavert përfshihet në polemika, pasi më herët ka bërë komente të ngjashme për futbollistë si Vinicius Junior dhe Kylian Mbappé.
Ndeshja mes dy përfaqësueseve vjen si një rikthim i sfidës së vitit 1998, ku Franca eliminoi Paraguajin falë "golit të artë" të shënuar nga Laurent Blanc në minutën e 113-të.