Tensionet në kufirin mes Izraelit dhe Libanit u përshkallëzuan ndjeshëm ditën e premte, pas një sërë sulmesh të ndërsjella. Forcat Mbrojtëse të Izraelit (IDF) njoftuan për vdekjen e 4 ushtarëve dhe plagosjen e 5 të tjerëve, si pasojë e një sulmi me dron në jug të Libanit, ngjarje e cila shërbeu si shkas për operacionet ushtarake izraelite.
Në përgjigje, forcat ajrore izraelite ndërmorën më shumë se 150 sulme gjatë natës dhe mëngjesit, duke goditur infrastrukturën e Hezbollahut në Luginën Bekaa dhe zonën e Nabatieh. Sipas deklaratave të IDF, në shënjestër ishin dy qendra komanduese. Ndërsa autoritetet izraelite raportuan për neutralizimin e "dhjetëra terroristëve", zyrtarët libanezë njoftuan se në mesin e të paktën 15 viktimave në Nabatieh kishte edhe gra dhe fëmijë.
Operacionet u justifikuan nga pala izraelite si reagim ndaj shkeljeve të përsëritura të armëpushimit nga grupi i mbështetur nga Irani. Megjithatë, përpjekjet diplomatike kanë sjellë ndërprerjen e luftimeve. Një zyrtar amerikan konfirmoi se palët kanë arritur dakordësi për një armëpushim, i cili ka hyrë në fuqi në orën 13:00.