Pavarësisht marrëveshjes së armëpushimit të arritur mes Izraelit dhe Hezbollahut, në jug të Libanit janë regjistruar sulme të reja gjatë orëve të natës dhe mëngjesit. Agjencia shtetërore libaneze e lajmeve, NNA, konfirmoi se avionë luftarakë dhe dronë izraelitë goditën zona të ndryshme në rajonin e Nabatiehut, duke shkaktuar shkatërrime të mëdha në ndërtesa banimi.
Sipas njoftimit zyrtar të Mbrojtjes Civile të Libanit, bilanci i viktimave ka shkuar në 16 të vrarë. Ekipet e emergjencës kanë vijuar operacionet e kërkim-shpëtimit, duke nxjerrë në siguri 47 persona, ndërsa 12 të tjerë raportohet se kanë mbetur të plagosur. Ndërhyrjet ushtarake kanë përfshirë gjithashtu bombardime me artileri në qytetin e Nabatiehut dhe zonat përreth përpara agimit.
Armëpushimi, i cili hyri në fuqi të premten në orën 16:00, ishte përshëndetur nga ndërmjetësuesit amerikanë si një mundësi për të ndalur përshkallëzimin e dhunës. Megjithatë, situata e krijuar ka shtuar shqetësimet për qëndrueshmërinë e këtij akordi, ndërsa palët vazhdojnë të akuzojnë njëra-tjetrën për shkelje. Deri në këto momente, Ushtria e Izraelit nuk ka dhënë një reagim zyrtar lidhur me këto goditje, ndonëse raportet e mediave tregojnë për vazhdimin e tensioneve në terren.